$ 455
€ 498.77
₽ 5.56

«Жиынға кешіккені үшін соққыға жыққан»: Жамбыл облысында 9-сынып оқушысы өлім мен өмір арасында жатыр

Редактор
03.11.2026, 11:28
“Халықстан” телеграм-арнасы
“Халықстан” телеграм-арнасы
Оқиғаға қатысушылар полицияға жеткізілген

Оқиға 31 қазан күні кешке Жамбыл ауданына қарасты Бірлесу-Еңбек ауылында болған. Жамбыл облыстық білім басқармасының мәліметінше, екі жасөспірім арасында жанжал туындап, олардың бірі екіншісінің кеуде тұсынан жұдырықпен ұрған. Соққыдан кейін оқушы есінен танып, ауруханаға жеткізілген, деп хабарлады Вairaqmedia.kz.

Дәрігерлер жасөспірімнің жағдайын өте ауыр әрі тұрақсыз деп бағалап отыр. Ол жансақтау бөлімінде өкпені жасанды желдету аппаратына қосылған. Қазір оған қарқынды ем жүргізіліп жатыр.

Ал зардап шеккен баланың туыстары оқиғаның себебі мүлде басқа болуы мүмкін екенін айтады. Олардың сөзінше, оқушы өзінен үлкен жасөспірімдер ұйымдастырған бейресми жиынға кешіккені үшін соққыға жығылған. Жақындары ауылда жоғары сынып оқушылары кішілерден ақша жинап, түрлі тапсырма беретінін, ал бағынбағандарды жазалайтынын алға тартады. Алайда бұл мәліметтер әзірге ресми түрде расталған жоқ. Жамбыл облыстық Полиция департаменті оқиғаға қатысты қылмыстық іс қозғалғанын растады.

«Алдын ала мәлімет бойынша, бұрыннан таныс екі кәмелетке толмаған жасөспірімнің арасында жанжал туындаған. Жәбірленуші ауруханаға жатқызылды. Оқиғаға қатысушылардың барлығы ұсталып, полицияға жеткізілді», – деп хабарлады ведомство.

Полиция жасөспірімдер арасындағы ықтимал бопсалау деректерін де тексеріп жатыр. Тергеу барысы Жамбыл облыстық Полиция департаменті басшылығының бақылауына алынған. Оқиғаның нақты мән-жайы мен оған қатысы бар адамдардың жауапкершілігі тергеу қорытындысы бойынша анықталады.