Бүгін, 21 қыркүйектен бастап Қазақстанда магистральдық теміржол желісінің қызметтеріне жаңа тарифтер күшіне енеді. Алдағы жылдары тарифтердің өсуі 23–24 пайызға жетеді, деп хабарлады Вairaqmedia.kz.
Қазақстандық жүк тасымалдаушылар үшін теміржол инфрақұрылымын пайдалану құны артады. Бұл туралы Қазақстанның жүк теміржол тасымалдаушылары қауымдастығы мәлімдеді.
Тарифтерді қайта қарауға Табиғи монополияларды реттеу комитетінің 2026 жылғы 2 қыркүйекте қабылдаған бұйрығы негіз болған. Құжат «Қазақстан темір жолы» ұлттық компаниясының магистральдық теміржол желісі қызметтеріне бұрын бекітілген тарифтерді өзгертеді.
Тарифтер қанша пайызға өседі?
Жаңа тарифтік саясатқа сәйкес, бағаның өсуі бірнеше жылға жоспарланған:
2026–2027 жылдары – 23–24%;
2028 жылы – 22%;
2029 жылы – 20%;
2030 жылы – 18%.
Алайда бастапқы ақпаратта қандай қызметтерге 23 пайыздық, ал қайсысына 24 пайыздық өсім қолданылатыны нақтыланбаған.
Азық-түлік тасымалына жеңілдік қарастырылған
Жаңа тарифтер барлық жүк түріне бірдей қолданылмайды. Әлеуметтік маңызы бар азық-түлік тауарларын тасымалдау үшін магистральдық теміржол желісін пайдалану құны бұрын бекітілген деңгейде сақталады.
Осылайша, бүгіннен бастап өзге санаттағы жүк тасымалдаушылар теміржол инфрақұрылымын пайдалану үшін жаңа тариф бойынша ақы төлейді. Тарифтерді кезең-кезеңімен өзгерту 2030 жылға дейін жалғасады.
