Алматы облысында «Ескерткіш — ел тарихы» атты кең ауқымды экологиялық акция өтті деп хабарлайды bairaqmedia.kz
Шараның негізгі алаңы — Іле өзенінің бойындағы тарихи орын Көшпенділер қалашығы болды. Игі бастама «Таза Қазақстан» республикалық жобасы аясында өтті.
Облыс аумағындағы тарихи-мәдени мұраның 152 нысанында тазарту және абаттандыру жұмыстары жүргізілді. Акцияға 10 мыңнан астам адам — мемлекеттік қызметкерлер, еріктілер, мәслихат депутаттары, Қазақстан халқы Ассамблеясының өкілдері, жастар және жергілікті тұрғындар ат салысты.
Экологиялық акцияның дәл Ескерткіштер күні Іле жағасында өтуі — ерекше мағынаға ие. Бұл мекен — ата-бабаларымыздың ізі қалған қасиетті орын. Оны сақтау — баршамыздың ортақ парызымыз. «Таза Қазақстан» жобасы аясында облыстың 373 елді мекені жұмылып, 55 мыңға жуық ағаш отырғызылды. Бұл — болашақ ұрпақтың саулығы мен табиғаттың әл-ауқаты үшін жасалған маңызды қадам”, — деді Алматы облысының әкімі Марат Сұлтанғазиев.
Осындай бастамалар өңірде игі дәстүрге айналып келеді. Олар қоғамда табиғат пен тарихи мұраға деген құрметті арттырып, ұлттың рухани байлығын ұлықтауға сеп болуда.
