«Ақ жол» демократиялық партиясы Құрылтайда өкілдік етуге нағыз мықты құрам жасақтады. Оның қатарына саяси салмағы зор тұлғалар, тәжірибелі парламентшілер, табысты кәсіпкерлер, өңірлік көшбасшылар және жаңа буынның кәсіби мамандар кірді, деп хабарлады Вairaqmedia.kz.
Олардың әрқайсысының артында нақты жетістіктер, салалық терең сарапшылық тәжірибе және азаматтардың мүддесі жолындағы көпжылдық еңбек тұр. Бұл команданың мемлекеттік ауқымда ойлай білетін, өңірлік проблемаларды терең түсінетін және практикалық тәжірибені біріктіретін құрам болатыны анық. Сондай-ақ, «Ақ жол» фракциясының Құрылтайдағы ең кәсіби әрі белсенді саяси күштердің біріне айналуына мүмкіндік береді.
Дания Еспаева – саяси салмағы зор тұлға және қазіргі қазақстандық саясаттағы ең ықпалды әйелдердің бірі. Оның артында Мәжілістің үш шақырылымындағы депутаттық қызмет, вице-спикер лауазымы және банк-қаржы саласындағы көпжылдық еңбек тәжірибесі жатыр. Бүгінде «Ақ жол» демократиялық партиясын басқарып отырған Дания Мәдиқызы партия дамуының жаңа бағытын айқындап, азаматтардың мүддесін дәйекті түрде қорғап келеді.
Асылхан Қожахметов – «Ақ жол» демократиялық партиясының негізгі саяси ұйымдастырушылары мен стратегтерінің бірі. Қалалық филиалда маман болып еңбек жолын бастаған ол партиялық құрылымның барлық сатыларынан дәйекті түрде өтіп, аппарат басшысы және Саяси кеңестің хатшысы қызметіне дейін көтерілді. Жиырма жылға жуық тәжірибесі оған ішкі саяси үдерістерді, өңірлік күн тәртібін және азаматтардың нақты сұраныстарын терең түсінуге мүмкіндік береді. Ол – ауқымды партиялық жұмысты ұйымдастыру және бүкіл ел бойынша филиалдардың қызметін үйлестіру тәжірибесі бар тұлға. Кәсібилігі, жүйелілігі және ісіне адалдығы Асылхан Төлепбергенұлын Құрылтайда партияның мықты өкілдердің бірі болатыны сөзсіз.
Олжас Нұралдинов – қазақстандық саясаткерлердің жаңа буынындағы жарқын өкілдердің бірі. Оның кәсіпкерлік саласындағы көпжылдық тәжірибесі бизнестің, логистиканың және жеке бастаманы дамытудың проблемаларды тереңінен түсінуге мүмкіндік береді. «Ақ жол» демократиялық партиясының Алматы қалалық филиалын басқара отырып, ол өзін жігерлі басшы және тиімді ұйымдастырушы ретінде көрсетті. VIII шақырылымдағы Мәжілісте Олжас Елтайұлы кәсіпкерлер мен экономикалық белсенді азаматтардың мүдделерін дәйекті түрде қорғай білді. Оның алға қойған мақсатына нық басатын және тәжірибелік ұстанымы жаңа Құрылтайдың нәтижелі жұмысы үшін қажет болады.
Дәурен Ахметжаев – өңір тұрғындарының нақты қажеттіліктерін жақсы білетін тәжірибелі кәсіпкер. Бухгалтерлік есеп және құқық салаларындағы білімі, сондай-ақ бизнесті басқарудағы көпжылдық тәжірибесі оған экономикалық және құқықтық мәселелерді кәсіби деңгейде түсінуге мүмкіндік береді. Алдымен Жамбыл облысындағы аудандық, кейін облыстық мәслихат депутаты болып сайланған ол азаматтардың мүдделерін дәйекті түрде қорғап келеді. Оның қоғамдық қызметі, жауапкершілігі және әлеуметтік бастамаларды қолдауы мемлекеттік және қоғамдық наградалармен атап өтілген. Дәурен Хайруллаұлының іс жүзіндегі тәжірибесі Құрылтай жұмысына салмақты үлес қосады.
Юрий Ли – қаржы, құқық және азаматтардың мүдделерін қорғау саласындағы беделді сарапшы. Ол кәсіби жолында еліміздің ірі банктерінде басшы болып, депутаттық қызметте және қаржы пирамидалары мен жосықсыз тәжірибелерге қарсы күресе отырып, көпжыл қызмет атқарды. VII шақырылымдағы Мәжілісте ол Қаржы және бюджет комитетінде жұмыс істеп, халықтың қаржылық қауіпсіздігін нығайтуға бағытталған шешімдерді ілгерілетті.
Бүгінде Юрий Виссарионович «Қазақстанның қаржылық мәдениеті» қорын және STOP-PIRAMIDA.KZ жобасын басқарады. Терең сарапшылық білімі мен принципшіл ұстанымы оны Құрылтайда азаматтардың мүддесін қорғайтын мықты өкіл етеді.
Бақтыбек Бибаев – халықаралық білімі бар, мемлекеттік қызмет тәжірибесін және мұнай-газ саласын терең түсінуді ұштастырған жаңа буын кәсіби маманы. Бейжіңдегі Қытай мұнай университетін тәмамдаған ол, халықаралық жобалардағы қызметтен Қазақстан Республикасының Энергетика министрлігіндегі жұмысқа дейінгі жолдан өтті. Бақтыбек Сәлбекұлы бүгінде Texol компаниялар тобының GR-директоры қызметінде отандық өнеркәсіпті дамыту және бизнес пен мемлекеттің тиімді өзара іс-қимылы мәселелерімен айналысады. Қазақ, қытай, ағылшын және орыс тілдерін еркін меңгеруі оған Қазақстанның мүдделерін халықаралық деңгейде сенімді түрде танытуға мүмкіндік береді. Оның кәсібилігі, заманауи ойлауы және практикалық тәжірибесі Құрылтай жұмысына жаңа серпін беретін болады
Мейраш Шынасылова – мықты өңірлік көшбасшы және Қазақстандағы әйелдер кәсіпкерлігінің ең тәжірибелі өкілдерінің бірі. Өз кәсібін жүргізуден бастап партияның облыстық филиалын басқаруға дейінгі жолдан өткен ол кәсіпкерлер мен өңір тұрғындарының проблемаларын жақсы біледі. Мейраш Шынасылова он жылдан астам уақыт бойы «Ақ жол» партиясының Алматы облыстық филиалын басқарып, оның позициясы мен азаматтар арасындағы беделін нығайтып келеді. Оның кәсіпкерлікті және елдің қоғамдық-саяси өмірін дамытуға қосқан үлесі көптеген наградалармен атап өтілген. Тәжірибесі, табандылығы және халыққа жақындығы оны Құрылтайда өңірлердің мүдделерін лайықты білдіретін өкіл етеді.
Ермекқали Юсупов – қоғам қайраткері, тәжірибелі басқарушы және нағыз патриот. Ол кәсіби жолында көлік саласында, мемлекеттік органдарда, сыртқы экономикалық салада және кәсіпкерлік бағытта қызмет атқарды. Он жылдан астам уақыт бойы «Ақ жол» партиясының Атырау облыстық филиалын басқарып, сонымен қатар облыстық мәслихатта өңір тұрғындарының мүдделерін білдіріп келеді. Инженерлік және экономикалық білімі, сондай-ақ MBA дәрежесі оған салмақты әрі практикалық тұрғыдан бағдарланған шешімдер қабылдауға мүмкіндік береді. Ермекқали Төлепқалиұлының көпжылдық тәжірибесі Құрылтайды едәуір күшейтеді.
Айта кетерлігі, партия тізімінің 63%-ы, яғни бес адам – жаңа тұлға, ал қалған үш өкіл бұған дейін жоғары заң шығарушы органда қызмет атқарған. Осылайша, «Ақ жол» тәжірибе мен кәсібилікті өзгерістер қуатымен ұштастыруға басымдық берді.
