Шымкентте Еңбекші аудандық полиция бөлімінің жергілікті полиция қызметі бастығының орынбасары Ерлан Жұманов зорлау дерегі бойынша тергеліп жатыр. Бұл туралы журналист Михаил Козачков өзінің Telegram-арнасында жазды, деп хабарлайды Bairaqmedia.kz.
Оның айтуынша, ер адамға қатысты арызды әріптесі – құқық қорғау органдарының қызметкері жазған. Әйелдің қазір жүкті екені атап өтілді.
Оқиғаға байланысты ҚР ҚК 120-бабы («Зорлау») бойынша қылмыстық іс қозғалған. Тергеуді Тұран аудандық полиция басқармасы жүргізіп жатыр. Қазір барлық қажетті сараптамалар тағайындалған, - деп жазды журналист.
Шымкент қалалық Полиция департаменті ақпаратты растады.
«Әйел адамның арызы бойынша қылмыстық іс тіркелді. Қазір істің мән-жайын анықтауға бағытталған кешенді тергеу амалдары жүргізілуде. Тергеу нәтижесінде процессуалдық шешім қабылданады», - делінген хабарламада.
Бұл іс қоғамның жіті назарында. Тергеу нәтижелері бойынша қосымша ақпараттар жария етіледі деп күтілуде.
