Петропавлда ескі қағазды қайта өңдеп, одан жаңа өнім шығаратын ірі кәсіпорынның құрылысы жүріп жатыр. Жоба қоқыс көлемін азайтып қана қоймай, пайдаланылған шикізатты қайта айналымға енгізуге мүмкіндік береді, деп хабарлайды Вairaqmedia.kz.
Жоспар бойынша кәсіпорынның алғашқы кезеңінде тәулігіне 60 тонна санитарлық-гигиеналық қағаз өндіріледі. Өндірістің негізгі шикізаты ретінде қайта өңдеуге жарамды ескі қағаз пайдаланылады.
Кәсіпорынның тағы бір ерекшелігі – суды үнемдеу технологиясы. Өйткені 1 тонна өнім өндіру үшін 200 текше метрден астам су қажет. Осыған байланысты зауытта суды тазалап, қайтадан өндірістік айналымға жіберетін арнайы тұйық жүйе қарастырылған. Яғни өндіріс барысында су бір рет алынып, тазартылғаннан кейін бірнеше рет қайта пайдаланылады. Бұл табиғи ресурстарға түсетін салмақты азайтып, кәсіпорынның су тұтыну көлемін төмендетуге мүмкіндік береді.
Осылайша, Петропавлдағы жаңа кәсіпорында макулатура ғана емес, өндірісте қолданылатын су да қайта айналымға жіберілмек.
