Қытайдың Таншань қаласында LRT алғашқы жылжымалы құрамдарын құрастыру жұмыстары жүргізіліп жатыр. 19 дана жылжымалы құрамға тапсырыс «CRRC Tangshan Co., Ltd» зауытында орналастырылды. Бұл туралы «City Transportation Systems» компаниясы мәлімдеді, деп хабарлайды Bairaqmedia.kz.
Ақпаратқа сәйкес, ұзындығы 60 метрлік жылжымалы құрамдар GOA 4 деңгейіндегі автоматтандырылған бағдарламалық-аппараттық кешенмен жабдықталады.
Төрт секциялы құрамдар толық жүктелгенде (шаршы метрге 6 адамнан келеді) 600-ден астам жолаушыны сыйдыра алады. Салондарда беріктігі жоғары материалдар, соның ішінде органосиликатты былғары және шыны талшықты композит қолданылады, бұл жолаушыларға жайлылықты арттырады, – делінген хабарламада.
Шуды азайту үшін келесі технологиялар қолданылады:
• қалыңдатылған терезелер және шуды бәсеңдету элементтері;
• диаметрі үлкейтілген дөңгелектер.
Құрамдар заманауи ақпараттандыру жүйелермен жабдықталады:
• сыртқы және ішкі электронды таблолар;
• LCD-мониторлар, олар қозғалыс бағытын, соңғы және келесі станцияларды, есіктердің ашылу жағын және шұғыл ақпаратты көрсетеді.
Астана климатының ерекшелігін ескере келе, алдыңғы терезесі температураны реттейтін электрлі жылыту жүйесімен жабдықталған. Бұл кенеттен болатын температура өзгерістерінде әйнектің булануының алдын алады. Кондиционер қондырғысының қуаты – 35 кВт (салқындату қуаты).
Техникалық сипаттамалары және жеткізу мерзімдері:
• Қуаты – 1 722 кВт;
• Ең жоғары жылдамдық – 80 км/сағ;
• Толық автоматтандыру және операторлардың тұрақты бақылауымен жүргізілетін пилотсыз басқару жүйесі.
Қазіргі уақытта алюминий қорытпасынан жасалған корпус элементтерін дайындау және дәнекерлеу жұмыстары жүргізіліп жатыр. Алғашқы жылжымалы құрамдар мамыр айының соңына дейін дайын болады. Қыркүйек айында алғашқы пойыздар жеткізілгеннен кейін тестілік сынақтар басталады, – деп атап өтті компания өкілдері.
