Барбекю дайындауға маманданған қытайлық аспаз америкалық кәсіпкер Илон Маскқа айрықша ұқсайтын болып шықты. Осыдан кейін оның танымалдығы арта түсті, деп хабарлады Вairaqmedia.kz.
Бұл жайлы South China Morning Post ақпарат таратқан.
Мәліметке сәйкес, 48 жастағы Ма Цзяньпин (Шэньси провинциясының Тунчуань қаласы) – қоғамдық тамақтану орнының менеджері әрі иелерінің бірі. Ол келушілер алдында өзінің аспаздық шеберлігін жиі көрсетіп тұрады. Ма өз мейрамханасында тағам ұсынып жүрген сәті түсірілген бейне Douyin әлеуметтік желісінде тез таралып, 1,3 миллионнан астам лайк жинаған.
Қолданушылар екі адамның сыртқы келбетінің ұқсастығын ғана емес, аспаздың «Ма» тегі дыбысталуы жағынан «Маск» сөзіне ұқсайтынын да атап өтті. Сонымен қатар, жасанды интеллект көмегімен жасалған мемдер де кеңінен тарады. Онда қолданушылар Маны костюммен бейнелеп, оның Маскқа ұқсастығын күшейткен, сондай-ақ оның бейнесін Apple компаниясының бас директоры Тим Куктың гриль жанында тұрған суретімен біріктірген.
Аспаз өзі күтпеген танымалдықтан ыңғайсызданып жүргенін айтты. Бұрын тыныш болған мейрамханаға келушілер саны екі есе артқанымен, әрі көптеген адам арнайы келіп, онымен суретке түсуді қаласа да, Ма танымалдылығын табыс көзіне айналдырудан бас тартқан. Ол тікелей эфир жүргізу және блогерлік мансапты дамыту жөніндегі ұсыныстарды қабылдамай отыр.
