«Қазақтелеком» монополиялық жоғары баға белгіледі деген күдікке ілінді, деп хабарлайды Bairaqmedia.kz.
Бәсекелестікті қорғау және дамыту агенттігінің мәліметінше, сымды интернет қызметтері нарығындағы бәсекелестік жағдайын талдау қорытындысы бойынша «Қазақтелеком» АҚ мен «Кар-Тел» ЖШС (Beeline) жиынтық үстем жағдайға ие екені анықталған.
Талдау барысында Агенттік қызмет көрсету кезінде бөгде байланыс операторларының көппәтерлі тұрғын үйлерге кіруіне, сондай-ақ кабельдік кәріз желілеріне қосылудың техникалық шарттары туралы ақпарат алуды қиындататын кедергілерді анықтады. Сондай-ақ анықталған кедергілерді жою бойынша тиісті ұсыныстар уәкілетті мемлекеттік органдарға жіберілді, – делінген БҚДА хабарламасында.
Сонымен бірге талдау аясында байланыс операторларының интернет қызметтеріне қойған бағасының динамикасы да зерттелді.
Талдау нәтижелері бойынша «Қазақтелеком» АҚ-ның іс-әрекеттерінде тауарға монополиялық жоғары баға белгілеу белгілері анықталды. Осыған байланысты Агенттік бәсекелестікті қорғау саласындағы заңнаманы бұзушылықтарды тергеп-тексеру рәсімін бастады, – делінген хабарламада.
