Мәжіліс депутаты, «AMANAT» партиясы фракциясының мүшесі Нартай Сәрсенғалиев премьер-министр Олжас Бектеновке ана мен баланың өміріне қатысты депутаттық сауал жолдады, деп хабарлайды Bairaqmedia.kz.
Депутат елімізде ана мен баланың өлімі жиілегеніне алаңдаушылық білдірді.
«Бұл дүниеге ұрпақ әкелу үшін перзентханаға аттанған ананы перзентімен бірге о дүниеге аттандырған жағдайлар өте көп. 2019 жылдан бері Қазақстанда 19 128 сәби шетінеген. 2024 жылы ғана 2 598 нәресте жарық дүниені көрмей, ата-анасы мәйітханадан алып шығуға мәжбүр болды, – деді депутат.
Депутат ұсынған ақпаратқа сәйкес, Абай, Ақтөбе, Алматы, Жетісу, Ұлытау облыстарында сәби өлімі көбейген. Ана өлімі де алаңдатарлық деңгейде. Соңғы 6 жылда 563 ана өмірден өткен. Оның ішінде Жетісу, Қостанай, Ұлытау, Ақтөбе облыстарында бұл көрсеткіш өте жоғары.
«2024 жылдың қорытындысы бойынша көз жұмған аналардың 54%-ы қалада, 46%-ы ауылда тұрған. Бір қорқынышты тенденция – төрт немесе одан да көп баласы бар әйелдер арасында өлім-жітім көбейген, салдарынан 97 бала тірі жетім қалды»,– деді депутат.
Сонымен қатар, облыс орталығынан шалғайдағы ауылдық жерлерде және аудандарда жүктілігі ауыр өтіп жатқан әйелдерді алдын ала емдеуге арналған пансионаттарды дереу салу керек. Себебі алыстағы ауылдан толғақ қысқан ананы орталыққа әкелгенше түрлі жағдай орын алуы мүмкін. «Патронаждық медбике» лауазымын енгізу қажет. Перинаталдық орталықтар мен перзентханалардың, балалар ауруханаларының материалдық-техникалық базасын жаңарту керек,– деді депутат.
