«Ауыл» партиясы Фракциясының мүшесі Қарақат Абден ІІМ басшысы Ержан Сәденовке сотталған әйелдерге рақымшылық жасау туралы депутаттық сауал жолдады, деп хабарлайды Bairaqmedia.kz.
Оның айтуынша, бүгінде 2336 әйел бас бостандығынан айырылған. Олардың жартысы – аналар, оның ішінде 250-і – көпбалалы аналар.
1500-ден аса бала анасыз қалып, аналарымен қауышуды күтіп жүр. Жүзге жуық сәби балалар үйлеріне жіберілген. Бұлар жай ғана цифрлар емес. Бұл – ойран болған отбасылар, бұзылған тағдылар, ең сорақысы – ана жылуынан айырылған сәбилер, – деді Қарақат Әбден.
Бұл ретте депутат сотталған әйелдерге амнистияны қолдану үшін келесі критерийлерді ұсынды:
- зорлық-зомбылыққа қатысы жоқ қылмысы үшін сотталған әйелдер;
- жүкті әйелдер мен кішкентай баласы бар әйелдер;
- көпбалалы әйелдер;
- алғаш сотталған әйелдер;
- жасы ұлғайған (60-тан асқан) әйелдер.
Ал, ауыр қылмыс, аса ауыр қылмыс жасап, зорлық-зомбылыққа байланысты қылмыс жасап, сол үшін сотталған, қоғамға қауіп төндіретін әйелдерге амнистия жасалмайды. Бұл мәселеде халықаралық тәжірибе жеткілікті. Мәселен, Қырғызстанда әйелдерге 1996 жылдан бері 3 рет амнистия жасалған. Өзбекстанда2013 жылы амнистия жасалып, әйелдер мен кәмелетке толмағандар босатылды. Ресей Президенті 2023 жылы әйелдергеамнистия жасау туралы идеяны қолдады. АҚШ-тың кейбір штаттарында әртүрлі қылмыс жасап сотталған әйелдерге бірнеше рет амнистия жасалды, – деді депутат.
