ІІМ-де «трамадолды» дәрігердің рецептінсіз сатқаны үшін қылмыстық жауапкершілік барын еске салды, деп хабарлайды Bairaqmedia.kz.
Полиция қызметкерлері дәріханалық нашақорлыққа қарсы күресті күшейту мақсатында 2023 жылы «трамадол» психотроптық заты есірткі заттарының тізіміне енгізілгенін еске салды.
Ақпаратқа сәйкес, есірткі қатарына енгізілгенге дейін «трамадол» ел бойынша 8 мыңға жуық дәріханада сатылған. Қазір ол дәрігердің рецепті бойынша тиісті лицензиясы бар дәріханаларда ғана сатылады. Жыл басынан бері «трамадолды» заңсыз сақтағаны үшін 3 адам қамауға алынды. Олардан 2500-ден астам таблетка тәркіленді.
Осыған байланысты дәріханалар мен фармацевтикалық компаниялардың басшыларына қолданыстағы заңнама талаптарын қатаң сақтау қажет екенін еске саламыз. Медицинада қолданылатын психотроптық заттар мен есірткілерді рецептсіз сату Қылмыстық кодекстің 297-бабы 3-бөлігімен қаралып, «есірткіні заңсыз өткізу» болып саналатынын ескертеміз. Бұл үшін 10 жылдан 15 жылға дейін бас бостандығынан айыру жазасы қарастырылған, – деді ІІМ есірткі қылмысына қарсы іс-қимыл комитеті басқармасы бастығының орынбасары Айбек Брыков.
