ТЖМ ұсынған 10 ереже: Жер сілкінісі кезінде не істеу керек?

Төтенше жағдайлар министрлігіне қарасты Сейсмологиялық зерттеулер институты жер сілкінісі кезінде қауіпсіздікті сақтау үшін орындалуы тиіс 10 қарапайым қадамды жариялады, деп хабарлайды bairaqmedia.kz

Маман­дардың айтуынша, бірінші кезекте үрейге бой алдырмау қажет. Лифт пен баспалдақты пайдалануға болмайды. Терезеден, ауыр жиһаздардан аулақ тұрып, жоғарғы қабаттарда іргелі қабырғалардың жанында паналау керек.

Төменгі қабаттардағыларға мүмкін болса, ғимараттан тез шығу ұсынылады. Ал көпқабатты үйлердің тұрғындарына жер дүмпу тоқтаған соң сыртқа шығу қажет.

Сейсмологиялық зерттеулер институты ұсынған 10 ереже:

• Жер дүмпуі кезінде үрейленбеңіз;
• Лифт және баспалдақпен қолданбаңыз;
• Жиhаздан, терезеден, ары тұрыңыз;
• Жасырынатын жерді табыңыз – жоғарғы қабаттарда негізгі іргелі қабырғалардың бұрышында орын алып жасырыныңыз;
• Төменгі қабаттарда – ғимараттан шығыңыз, жоғарыда – дүмпу тоқтаған соң эвакуациялаңыз;
• Мүмкін болса, газды, суды, электр қуатын өшіріңіз;
• Дабыл жол сандығын алыңыз (алдын ала дайындау қажет);
• Электр желілерден, ғимарат, ағаштардан аулақ болыңыз;
• Жер сілкінуіне дайын болыңыз;
• Қарт адамдарға, балаларға, мүмкіндігі шектеулі адамдарға көмек көрсетіңіз.

Мамандар сейсмикалық қауіп жоғары өңір тұрғындарын қауіпсіздік ережелерін үнемі есте сақтауға шақырды.

Еске салайық, Алматы халқы 4 желтоқсанда шамамен 12:45-те жер сілкінісін сезді.  Тұрғындарға зілзала туралы ескерту келді. Зардап шеккендер мен қираған ғимараттар жоқ. Жерасты дүмпуінің ошағы Алматыдан оңтүстік-шығысқа қарай 277 шақырым жерде, Қытай аумағында орналасқан.

Сейсмологтардың мәліметінше, жер сілкінісінің магнитудасы MPV 6.7, тереңдігі – 5 шақырым. Алматыда және облыстың бірнеше елді мекенінде жер сілкінісі MSK-64 шкаласы бойынша 2-3 балл деңгейінде сезілді.

Есептік қарқындылық (баллмен) төмендегідей болды:

• Алматы қаласы – 3 балл, 277 шақырым;
• Алматы облысы, Талғар қаласы – 3 балл, 271 шақырым;
• Алматы облысы, Қаскелең қаласы – 3 балл, 283 шақырым;
• Алматы облысы, Алатау (Жетіген) қаласы – 2 балл, 314 шақырым;
• Алматы облысы, Қонаев қаласы – 2 балл, 336 шақырым;
• Жетісу облысы, Жаркент қаласы – 2 балл, 374 шақырым;
• Жетісу облысы, Талдықорған қаласы – 2 балл, 444 шақырым;
• Жамбыл облысы, Шу қаласы – 2 балл, 476 шақырым.