Әлеуметтік желілерде Қарағанды және Ұлытау облыстарында қыста қырылған киіктердің суреттері мен видеолары тарады. Мұндай жағдайлар еліміздің бірнеше аймағында – Ұлытау, Қарағанды, Қызылорда, Атырау, Батыс Қазақстан облыстарында да тіркелген, деп хабарлайды Bairaqmedia.kz.
Мамандардың айтуынша, бұл – киіктердің табиғи биологиялық ерекшеліктерімен байланысты құбылыс.
Қалыпты жағдайда киіктердің жыл сайынғы табиғи өлімі жалпы санның шамамен 20%-ын құрайды, ал аталықтарының 50%-ы қырылуы мүмкін. Қыстың қатал болуы және азықтың тапшылығы әлсіз киіктердің қырылуына себеп болады, – деп түсіндірді Зоология институтының териология зертханасының меңгерушісі А.Грачев.
Болған жағдайға байланысты жергілікті атқарушы органдар мен Орман шаруашылығы және жануарлар дүниесі комитеті арнайы алгоритм негізінде өлекселерді жою жұмыстарын жүргізуде. 150-ден астам маман мен 51 техника жұмылдырылған. Жыл басынан бері 5,2 мыңнан астам киік ұшасы жойылды.
Айта кету керек, Қазақстандағы киіктердің жалпы саны – 4,1 миллион бас. Бұл көрсеткіш Кеңес дәуіріндегі ең жоғарғы деңгейден үш есе жоғары.
Мамандар табиғат заңдылығына сәйкес, осындай жағдайлар жыл сайын тіркелетінін және алаңдауға негіз жоқ екенін атап өтті.
