Каспий теңізі жағалауынан 122 итбалықтың өлексесі табылды. Ғалымдар көпжылдық зерттеулерге сүйеніп, итбалықтардың неден қырылуы мүмкін екенін болжады, деп хабарлайды bairaqmedia.kz Ауыл шаруашылығы министрлігінің сілтеме жасап.
Ведомствоның мәліметінше, 2025 жылғы 3 қарашада Жайық-Каспий облысаралық бассейндік балық шаруашылығы инспекциясының қызметкерлері Маңғыстау облысы Түпқараған ауданы аумағындағы Каспий теңізі жағалауына мониторинг жүргізу барысында жағалауға шығып қалған итбалықтардың өлексесін тапқан.
Аталған дерек бойынша жергілікті барлық мүдделі мемлекеттік органдар хабардар етілген.
Жұмыс тобы итбалықтардың өлексесі табылған жерге барып, 2025 жылғы 3 қарашада сағат 23:00-дегі жағдай бойынша 112 итбалықтың қырылғанын анықтаған. Өлекселер шіріп кеткен. Аталған дерек Маңғыстау облысы Түпқараған ауданының ішкі істер бөлімімен Бірыңғай сотқа дейінгі тергеп-тексерулер тізіліміне тіркелген.
"Бағдарламалық-нысаналы қаржыландыру шеңберінде Каспий итбалығын зерттеумен айналысатын ғылыми ұйым – Гидробиология және экология институтының мамандары оқиға орнында итбалық өлекселерін жарып, зерттеу үшін алынуы мүмкін сынамаларды жинау жұмыстарын жүргізіп жатыр.
Табылған итбалықтардың өлексесі санитарлық нормаларға сай жиналып, жойылуда", - делінген хабарламада.
Гидробиология және экология институты мамандарының пікірінше, итбалықтардың қырылғанына бір айдан астам уақыт өткен, алайда олардың өлекселері Түпқараған ауданының аумағындағы теңіз жағалауына батыс бағыттан соққан дауылды желдің әсерінен енді ғана шыққан.
Сонымен қатар ғалымдардың көпжылдық зерттеулері негізінде итбалықтардың қырылуының ықтимал себептері ретінде олардың иммунитеті мен жалпы төзімділігінің әлсіреуі, соның салдарынан инфекциялық ауруларға бейімделгіштіктің артуы көрсетіліп отыр.
Қазіргі таңда Каспий теңізі жағалауын бақылау жұмыстары жалғасып жатыр.
